Sandgruebe, Basel. D Vorbereitig fuers Glygge-Grimpeli het do dermit agfange, ass zwai Schpiiler und zwai Fans sich am Voroobe am Usdraagigsort droffe und dr Matsch Aengland:Amerika genau gstudiert haenn (so genau das halt gange isch bi daem miserable scharf-unscharf-Public Viewing-Ageboot, wo d Optimischte uns bote kha haenn). Aber s Fazit isch klar gsi: eso schiesst me e Gool und eso doerf me kains kriege…

Topmotiviert isch es denne am Sunndigmoorge sowit gsi. D Mannschaft isch haellwach und voller Tatedrang ins erschti Schpiil gaege d Verschnuffer Selections gange. Aber scho gli isch s erschti Gool fuere Gaegner gfalle, jetzt hets gheisse drabliibe! Nacheme schoene Pass vom Baur ufe Marksteiner haenn d Schnoogge-Stolperi au koenne juble. Bravo. Aber kurz vorem Abpfiff hets  e Daempfer in Form vomene bloede Fierigsdraeffer fuer Verschnuuffer gsetzt und so haenn sie dr erschti Matsch 1:2 verloore...

Numme nit drueber nochedaengge und grad besser mache, isch d Devise gsi und worum nit grad gege JBC Girls United. Vellicht isch es d Verwirrig um dr Namme vo daere Fraue-Maa-Mannschaft gsi oder die faelendi Unterstuetzig am Schpiilfaeldrand, aber es het numme eso knallt im Schnoogge-Gool. Do het au dr Aschlussdraeffer vom Häner in dr letschte Minute nuet me dra koenne aendere. Aber glich: e schoens Witschussgool isch es gsi. S Schluss-Resultat het denne aber halt leider trotzdaem 3:1 gheisse.

Im vorussichtligi letschte Schpiil gaege dr Dimpf Clup isch es lang 0:0 bliibe, was aber nit heisse soell, ass es langwiilig gsi isch. Ganz im Gaegedail: Beidi Mannschafte haenn das erschti Gool gsuecht kha, au wenn d Schnoogge-Stolperi sich die wytuss bessere Chance usegschpiilt kha haenn. D Beloonig isch in Form vomene grandiose Siigesdraeffer vom Marksteiner uszaalt worde. Eso hets ganz am Schluss doch no zumene knappe 1:0-Siig glaengt kha.

Mit numme drey Puenggt hets de Schnoogge-Stolperi leider nit zunere Qualifikazion in d Zwuescherundi glaengt kha…

D Mannschaft und die wenig aagreiste Fans haenn sich binere gmeinsame Sterggig ufem Glaend erholt und so isch es doch e schoene Sunndig gsi.

Schnoogge-Stolperi: Bachmann, Ballmer, Baumann, Bisang, Bösch, Casanova, L.Gmür, Häner, R.Hartmann, Marksteiner, Zimmermann

Gool: Marksteiner, Häner, Marksteiner

Fans: Bürgler, D.Gmür, Meyer, Stohler, Tribolet

Fotigraf: Heptig (d Foteli kasch in Kuerzi uf daere Houmpeitsch go bewundere)

Bemerggig: D Schnoogge-Stolperi haenn dr Gooli L.Gmür nachem erschte Schpiil dure Ballmer ersetzt kha. Das aber nit waege faelendem Koenne, sondern waegere lychte Verletzig. Es goot ihm guet, aer het d Mannschaft au grad umgehend als Faeldschpiiler koenne unterstuetze.

Verwarnige: Alles isch fair und ooni Verwarnige oder Karte ueber d Bueni gange.